MKAGUZI NA MDHIBITI MKUU WA HESABU ZA SERIKALI (CAG)AANIKA MADUDU HALMASHAURI KYELA

MKAGUZI na Mdhibiti Mkuu wa Hesabu za Serikali (CAG), amebaini madudu katika matumizi na mapato ya Halmashauri ya Wilaya ya Kyela mkoani Mbeya.

Kutokana na upungufu huo, CAG amewataka madiwani kuchukua hatua ili waliosababisha ufujaji huo wa fedha wachukuliwe hatua za kisheria.

Upungufu huo upo katika baadhi ya miradi ya maendeleo chini ya mfuko wa LGCDG yenye thamani ya sh 326,208,530 ambayo haikukamilika na fedha hazionekani.

Mradi mwingine ni ule ulio chini ya mfuko wa MMAM, wenye thamani ya sh 218, 349, 260 ambao nao haukukamilika na fedha hazionekani.

CAG aliitaja miradi mingine kuwa ni madawa yenye thamani ya sh 9,867,005 yaliyoharibika, lakini hayakufutwa na kuondolewa kwenye vitabu, mradi wa thamani ya sh 208,140,250 wa mfuko wa ASDP uliokamilika, lakini hautumiki kana kwamba fedha zilizotumika ziliokotwa, pamoja na mradi wa barabara yenye thamani ya sh 181,146,200 ambao haujakamilika na fedha zilizotengwa hazionekani.

Pamoja na upungufu huo wa msingi, mkaguzi katika taarifa yake alibaini hoja zilizojadiliwa na kufungwa katika mwaka 2011/2012 ni 37 kati ya 79 wakati 42 hazijafungwa. Zitakaguliwa na kujadiliwa tena mwaka 2012/2013.

Aidha, katika kikao cha Kamati ya Fedha, Uongozi na Mipango cha kupitia hoja za CAG kilichofanyika katika ukumbi wa Community Center Julai 22, 2013 na Baraza la Madiwani lililofanyika Septemba 4, 2013, baada ya kubainika kuwepo na upungufu kadhaa wakuu wa idara na madiwani walipewa ushauri kuufanyia kazi.

Mwenyekiti wa kikao hicho ambaye pia ni Mkuu wa Mkoa wa Mbeya, Abbas Kandoro alitoa ushauri kwa watendaji na wataalamu ambao aliwataka wazingatie kanuni, taratibu, miongozo na sheria za fedha na manunuzi ya umma, na pia aliwataka wataalamu hao kutoa ushirikiano kwa wakaguzi wa ndani na nje pindi wanapokuja kukagua ili kuleta ufanisi katika kutekeleza shughuli zao.

Aliendelea kuwataka wataalamu kusimamia matumizi ya sheria ndogo ndogo za kuzuia magonjwa ya mifugo ambayo inawataka wafugaji kutumia kikamilifu majosho kwa kuogesha mifugo yao, na kuwa aliwataka wataalamu kuandaa sera na mpango kwa ajili ya kuzuia majanga na hasara kwa wahanga (Risk and Fraund Assessment Policy) ikiwamo mpango wa kuhakikisha dawa, vifaa tiba, vitendanishi na vifaa chakavu vilivyokwisha muda wa matumizi vinateketezwa.

Mkuu huyo wa mkoa aliwataka madiwani na watendaji kushirikiana katika kufanya shughuli za wananchi kupitia halmashauri ya wilaya kwa kuwa tayari imepata hati ya shaka kutokana na utendaji mbaya na kwamba wasipokuwa makini kuna uwezekano wa kupata hati chafu.

Wananchi kwa upande wao waliokuwepo katika kikao hicho kilichokaliwa siku za hivi karibuni walishangazwa na taarifa hizo za ubadhirifu uliofanywa katika halmashauri hiyo na kupata wasiwasi juu ya uwezo duni wa madiwani wao ambao mbali na kupewa ushauri na mkuu wa mkoa wameshindwa kuchukua hatua kwa watendaji waliokwamisha shughuli za maendeleo.

Imeandaliwa na Ibrahim Yassin (Kyela)

BOFYA HAPA KUSOMA ZAIDI HABARI HII

ZAIDI YA WANACHUO 300 KUKOSA MKOPO KUTOKA BODI YA MIKOPO(HELB)....NI WALE WALIOCHELEWA KUHAKIKI UPYA TAARIFA ZAO..!!

Zaidi ya wanafunzi 300 wa elimu ya juu wa vyuo mbalimbali watakosa mikopo kutoka Bodi ya Mikopo ya Wanafunzi wa Elimu ya Juu (HESLB), kutokana na kushindwa kujaza fomu za kuomba mikopo katika kipindi kilichowekwa.
Watakaokosa mikopo hiyo kwa mwaka wa masomo wa 2013/2014 ni kuanzia mwaka wa pili na kuendelea, ambao hawakujaza fomu za kuonyesha taarifa zao mpya kwa bodi.
Wanafunzi hao walitakiwa kuwasilisha maombi ya kupewa mikopo kati ya Mei hadi Julai 30, mwaka huu.
Mkugenzi Msaidizi wa Habari, Elimu na Mawasiliano wa HELSB, Cosmas Mwaisobwa, aliyasema hayo jana jijini Dar es Salaam alipozungumza na waandishi kuhusu utendaji wa kazi wa bodi hiyo.
Mwaisobwa alisema kwa kuwa wanafunzi hao hawakujaza fomu za kuomba mikopo, mwaka huu hawatapata fursa hiyo na kwamba kwa mujibu wa utaratibu wao, kila mwaka lazima mwanafunzi aombe.

Alisema wanafunzi watakaokosa fursa hiyo ya mikopo wameanza masomo yao katika vyuo mbalimbali nchini na kwamba  HESLB haijui sababu zilizowafanya wasiombe.
Kuhusu ufanisi katika utoaji wa mikopo, Mwaisobwa alisema idadi ya wanafunzi wanaoomba mikopo imeongezeka kutoka 42,729 mwaka 2005/2006 hadi kufikia wanafunzi 97,348 mwaka 2012/2013.
Aidha, Mwaisobwa alisema bajeti ya kuwakopesha wanafunzi imeongezeka kutoka Sh. bilioni 56.1 mwaka 2005/2006 hadi kufikia Sh. bilioni 306 mwaka 20012/2013.
Alisema mwaka huu serikali imeitengea bodi hiyo Sh. bilioni 325 kwa ajili ya kuwakopesha wanafunzi wapya, 31,647 na 62,376 wanaondelea na masomo yao katika vyuo mbalimbali.
Wakati wanafunzi hao wakikosa fursa ya mikopo, mapema mwezi huu, Waziri wa Elimu na Mafunzo ya Ufundi, Dk. Shukuru Kawambwa, aliitaka bodi hiyo kuendelea kutoa huduma kwa ufanisi na weledi mkubwa kwa mwaka huu wa masomo ili kuepusha migogoro ya wanafunzi kuhusu mikopo.

BOFYA HAPA KUSOMA ZAIDI HABARI HII

Kaimu Katibu Tawala mkoa wa Mbeya Leonard Magacha akisaini katika kitabu cha wageni baada ya kuwasili katika viwanja vya TIA kushiriki mashindano ya ngoma za asili. 

WANANCHI wameaswa kupenda utamaduni wa Asili hususani ngoma za Makabila ili kuenzi mila na desturi zilizoachwa na mababu  tangu zamani na siyo kuegemea katika nyimbo za kizazi kipya.

Mwito huo ume na Kaimu Katibu Tawala Mkoa wa Mbeya, Leonard Magacha wakati akifungua mashindano ya Ngoma za Asili yaliyofanyika katika Viwanja vya Chuo cha Uhasibu(TIA) Jijini hapa.

Magacha amesema mashindano ya ngoma za asili yatasaidia kuamsha ari ya kupenda utamaduni wa Mtanzania kwa kuenzi Mila na Desturi zilizoachwa na waliotanguliatangu zamani kabla ya sayansi na teknolojia ambapo vifaa vya asili vilitumika.

Ameongeza kuwa kupitia mashindano hayo itakuwa chachu ya kufufua utamaduni vijijini ikiwa ni pamoja na kupima utendaji kazi wa Maafisa utamaduni wa Wilaya kwa kuhamasisha na kuwafundisha wananchi kuzipenda ngoma za asili.

Kwa upande wake Afisa Michezo na Utamaduni wa Mkoa wa Mbeya, George Mbigima, amesema kama Mkoa utandaa mashindano makubwa mwakani ambayo yataanzia kwenye ngazi ya Kijiji, kata, Wilaya na hatimaye kumpata mshindi wa Mkoa.

Naye Mkuu wa Matukio wa kampuni ya Bia Tanzania (TBL) kanda ya Mbeya, Geophrey Mwangungulu ambao ndiyo waandaaji wa Mashindano hayo amesema lengo la kuandaa tukio hilo ni kuhamasisha wananchi kupenda ngoma za asili pamoja na utamaduni.

Amesema jumla ya vikundi 26 vilijitokeza kushiriki mashindano hayo kutoka katika Wilaya za Mbeya, Rungwe, Kyela,Mbozi Njombe na Iringa ambapo katika Mashindano hayo Mshindi wa Kwanza aliibuka na kitita cha fedha taslimu Milion moja na Kikombe.

Mshindi wa pili aliibuka na shilingi laki tano huku mshindi wa Tatu akiondoka na shilingi laki mbili na washiriki wengine wakiambulia kifuta jasho cha shilingi 50,000/= kwa kila kundi.

Katika mashindano hayo yaliyokuwa kivutio kwa mamia ya Wakazi wa Mbeya kikundi cha ngoma cha Kasanga maarufu kwa Ing’oma kutoka Wilayani Rungwe ndiyo walioibuka kidedea katika kinyang’anyiro hicho.

Nafasi ya pili ilienda kwa kikundi cha ngoma za asili cha Lipango kutoka Isansa Wilayani Mbozi na Nafasi ya Tatu ikinyakuliwa na Kikundi cha Mbeta kutoka Isyesye Jijini Mbeya.

Mkuu wa matukio Geophrey Mwangunguru akizungumza na wananchi waliofurika kushuhudia mashindano hayo.

Mgeni rasmi Kaimu Katibu Tawala wa Mkoa wa Mbeya akizungumza na mamia ya Wananchi na washiriki wa Mashindano ya ngoma za asili. 

Baadhi ya Watumishi wa TBL pamoja na viongozi mbali mbali wakifuatilia kwa makini burudani zilizokuwa zikiendelea kutoka kwa washiriki.

Majaji wakifuatilia kwa makini Washiriki kama wanafuata vigezo na masharti ya mashindano na kuchukua alama.

Mkuu wa matukio akiwa ameshika kikombe atakachojishindia mshindi wa kwanza katika kucheza na kuimba ngoma za asili.

Mmoja wa Majaji Nimwindael Mjema akisoma washindi wa shindano la ngoma za asili kuanzia nafasi ya 20 hadi ya 4 ambao waliambulia kifuta jasho cha shilingi 50000 kila kundi.

Baadhi ya vikundi vya ngoma za asili wakiwa wamekaa wakipewa maelekezo mbali mbali kabla ya kuanza kwa mashindano

Vikundi vikiwajibika uwanjani.

Wananchi mbali mbali wakifuatilia mashindano hayo

Mzee wa mila ambaye pia ni kiongozi wa kikundi cha ngoma cha Kasanga kutoka Tukuyu Wilayani Rungwe akiwa ameshikilia kombe na fedha taslimu shilingi Milion Moja baada ya kuibuka washindi wa kwanza wakicheza ngoma yao aina ya Ling'oma.

BOFYA HAPA KUSOMA ZAIDI HABARI HII

CHADEMA YAUNGURUMA KYELA

Mkutano mkubwa wa kihistoria kwa CHADEMA Wilayani Kyela uliofanyika Jumatatu 16/9/2013 kwenye viwanja vya siasa mjini Kyela. Mgeni rasmi akiwa Katibu Mkuu Mhe. Dr. Slaa akiambatana na makamanda kadhaa wakiwemo wabunge machachari Mhe. Sugu na Mhe. Silinde. Mkutano huo ulikuwa ni mahsusi kuzungumzia suala la kutolewa nje ya ukumbi wa Bunge kwa  Mhe. Mbowe na kudhalilishwa kwa Mhe. Sugu bungeni. 

BOFYA HAPA KUSOMA ZAIDI HABARI HII

PESA INAONGEA;HATIMAYE MASOGANGE AACHIWA HURU KESI YA MADAWA YA KULEVYA NCHINI AFRIKA KUSINI

Mtanzania Agnes Gerald, maarufu Masogange, ameachiwa huru na Mahakama ya Kempton ya jijini Johannesburg, baada ya kulipa faini ya R30,000 (Sh4.8 milioni) kwa kosa la kubeba kemikali zinazotumika kutengeneza dawa za kulevya.

Wakati Masogange akitozwa faini hiyo mwenzake, Melissa Edward ameachiwa huru na mahakama hiyo, baada ya kukosekana ushahidi wa kumtia hatiani.

Msemaji wa Kitengo cha Uchunguzi wa Makosa ya Jinai cha Afrika Kusini(Hawk), Kapteni Paul Ramaloko alisema Watanzania hao wameachiwa huru baada ya kuonekana kuwa hawakubeba dawa za kulevya, bali kemikali aina ya ephedrine.

Hata hivyo, Mahakama ilibaini kuwa, Melissa hana hatia kwa kuwa ilionekana kuwa amemsindikiza Masogange, ambaye alimwomba amsaidie kubeba mzigo huo.

“Mahakama iliona kuwa Melissa aliombwa tu kumsaidia kubeba baadhi ya mabegi, lakini hayakuwa yake. Mizigo yote iliandikwa jina la Agness Gerald na si Melissa,” alisema Kapteni Ramaloko.

Kapteni Ramaloko alisema, Melissa alijitetea kuwa hakuwa amesafiri pamoja na Masogange bali walikutana ndani ya ndege na Masogange alimwomba amsaidie kubeba mizigo hiyo, kwani ilikuwa mikubwa.

Kwa sheria za Afrika Kusini kubeba kemikali zozote ambazo zimepigwa marufuku ni kosa la jinai kisheria, hivyo mahakama iliamuru Masogange ahukumiwe kwenda jela kwa miezi 30 (miaka miwili na miezi mitano) au alipe faini ya R30, 000 (sawa na Sh4.8 milioni).

Hata hivyo, Kapteni Ramaloko alisema mdhamini wa Masogange alilipa nusu ya fedha na kwamba zinazobaki amalizie baadaye.

Alisema kutokana na kutomalizia kulipa fedha hizo ataendelea kubaki nchini humo hadi atakapomaliza kulipa nusu ya faini iliyobaki.

Masogange na mwenzake walipokamatwa na SARS ilielezwa walikuwa wamebeba dawa za kulevya aina ya

Methamphetamine, lakini Mahakama juzi ilithibitisha walikamatwa na kemikali aina ya Ephedrine, ambayo siyo dawa za kulevya.

Wakati Kamishna Mkuu wa Kitengo cha Kudhibiti Dawa za Kulevya nchini, Geofrey Nzowa alipoulizwa na Mwananchi Jumamosi juzi alisema mzigo walioubeba Masogange na mwenzake haukuwa ni dawa za kulevya bali ni kemikali za dawa za kulevya, lakini Msemaji wa Mamlaka ya Mapato ya Afrika Kusini, (SARS), Marika Muller alieleza kuwa timu ya SARS ina uhakika kuwa mabegi sita yaliyokamatwa Julai 5 ni dawa za kulevya aina ya Methamphetamine.

BOFYA HAPA KUSOMA ZAIDI HABARI HII

MAWAZIRI MHESHIMIWA KAWAMBWA,MULUGO WAPEWA MIEZI 6 NA CCM KUJIUZULU

CHAMA Cha Mapinduzi (CCM) kimemtaka Waziri wa Elimu na Mafunzo ya Ufundi, Dk. Shukuru Kawambwa kujiuzulu kwa kushindwa kulipa madeni ya walimu nchini.

Katibu Mkuu wa CCM, Abdulrahman Kinana pia ametoa muda wa miezi sita kwa Waziri huyo na Naibu wake Philip Mulogo kutekeleza hilo agizo hilo vinginevyo chama kitawatumia wabunge wake kuwatimua kwa nguvu.

Kwa mujibu wa taarifa za madeni zilizokusanywa na Chama cha Walimu Tanzania (CWT), hadi sasa walimu wanadai malimbikizo yao ya Sh bilioni 49 ambayo hajalipwa na Serikali.

Kinana alikuwa akihutubia mikutano ya hadhara jana katika wilaya za Bariadi na Busega.

Alisema CCM haiko tayari kuona walimu wakinyanyaswa wakati wana madai ya msingi.

Hivi sasa imejengeka tabia kwa baadhi ya mawaziri na watendaji wa wizara ya kuwadharau walimu na hata kuwanyanyasa huku wengine wakishusha utu na heshima ya walimu kwa kuwatukana, alisema.

Kinana ambaye yupo katika ziara ya mikoa ya Kanda ya Ziwa alisema kwa mawaziri kushindwa kutatua kero za walimu, imefika wakati wahusika waondoke wenyewe na wasipofanya hivyo chama kitawaagiza wabunge wake wawafukuze kwa nguvu.

“Ninatoa muda wa miezi sita kwa Waziri wa Elimu na wasaidizi wake wakiwamo watendaji kuhakikisha wanalipa madeni ya walimu haraka. Haiwezeni hii ni nchi ya watu wote wakiwamo walimu wadharauliwe na hata kunyanyaswa kwa maneno ya matusi

“Hili hapana CCM haiko tayari kuona walimu kila siku wakipigwa danadana kutokana na uzembe wa watu waliokabidhiwa dhamana za kuongoza sekta ya elimu katika nchi yetu,” alisema.

MTANZANIA ilimtafuta Katibu Mkuu wa CWT, Ezekiah Oluoch ambaye alisema hadi sasa madeni ya walimu yamefikia Sh bilioni 49 ambayo ni malimbikizo ya mishahara na mapunjo.

“Kila mara tunawaambia kuwa ni vema Serikali itafute Sh bilioni 100 katika fungu la dharura ili iweze kulipa madeni ya walimu na iachane nao lakini hawasikii,” alisema Oluoch.

-Mtanzania

BOFYA HAPA KUSOMA ZAIDI HABARI HII

ANGALIA ORODHA YA TAASISI 10 BORA NA KOZI ZAKE NCHINI

1.UDSM-Engineering,Economics,Llb,PSPA ,Sociology,B com,Education,Computer Science.
2.SUA-Agriculture,Veterinary Medicne,Animal Science.
3.Mzumbe-Accounting+Management.
4.muhimbili-MD+pharmacy.
5.ARDHI UNIVERSITY-Archtecture,Building Economics,Urban+Rural Planning,Land Evaluation.
6.UDOM-Education. 
7.SAUT-Mass Communication.
8.IFM-Accounting,Finance,Banking
9.IAA-Accounting.
10.TIA-accounting

BOFYA HAPA KUSOMA ZAIDI HABARI HII

MWANAMKE AUWAWA KWA KUCHOMWA KWENYE KOROMEO NA MUMEWE HUKO KAWE DAR ES SALAAM

Polisi Jamii na wakazi wa Kawe Ukwamani jijini Dar es Salaam, wakiupakia kwenye gari la polisi, mwili wa mwanamke Yusta Mkali jana. Mwanamke huyo alikutwa amekufa katika chumba walimokuwa wakiishi 

Mkazi wa Kawe jijini Dar es Salaam Musa Senkando , anatafutwa na polisi kwa tuhuma za kumuua mkewe, Yusta Mkali , baada ya kumchoma na kitu chenye ncha kali na kumtoboa koromeo.
Mauaji hayo yalitokea jana asubuhi eneo la Kawe Kanisani jijini 
dar es Salaam ambapo mwandishi wetu alifika eneo la tukio na kuushuhudia umati mkubwa uliokuwa nje ya nyumba ya Senkando na familia yake.
Aidha baada ya mauaji hayo,  mtuhumiwa aliuacha mwili wa mkewe kitandani na kukimbilia kusikojulikana.
Akithibitisha tukio hilo, Kamanda wa Polisi wa Mkoa wa Kinondoni, Camillius Wambura,  alisema uchunguzi wa awali umebaini kuwa mauaji hayo yalitokea usiku wa kuamkia jana.
Wambura alisema muuaji anasadikiwa kutumia kitu chenye ncha kali na kumshambulia mkewe kwenye koromeo.
Mtoto wa marehemu Yusta, Joshua Zebedayo anayekadiriwa kuwa na zaidi ya miaka 15 alisema hakufahamu juu ya mauaji hayo na kwamba  alishtushwa  alipouona  mwili wa mama yake ukiwa kitandani, wakati huo alipoingia kusafisha chumba cha wazazi wake saa mbili asubuhi .
Alieleza kuwa ni kawaida yake kuwasaidia usafi kwa kuwa wazazi wake huenda kazini alfajiri.
“Nilikuta mlango umefungwa, nikaufungua ila cha kushangaza nilimkuta mama amelala wakati alipaswa kuwa kazini, nilivyofunua shuka nikamuona amelowa damu . Hali aliyokuwa nayo ilinifanya nihofu kuwa amefariki dunia. Sikuweza kukaa kimya nilianza kupiga kelele,” alisema kijana huyo, kwa huzuni akilia .
Joshua alisema kabla ya kifo hicho hali ya nyumbani kwao ilikuwa shwari kwani wazazi wake walikuwa wanaishi kwa furaha kama kawaida .
“Jana mama alitoka kazini kama kawaida saa  12 jioni tukala na niliwaacha wakiwa wanazungumza na kuwasiliana vizuri na walikuwa wanacheka , ”alisema.
Mwenye nyumba walikopanga familia hiyo,  Watatu Hadija, aliliambia gazeti hili kuwa haelewi kama wenza hao walikorofishana au nini kilitokea kwa kuwa mlango  wa vyumba vyao ulikuwa umefungwa na hawakusikia kelele zozote.
“Asubuhi hii sisi tulisikia kijana Joshua akipiga makelele ndipo tulipotambua kuwa Yusta amefariki,” alisema.
Hadija alisema marehemu kabla ya kifo chake alirudi kutoka kazini na kutaniana naye kama ilivyokuwa  kawaida yao.
“Yusta alikuwa ni mpole na amekaa hapa kwa miaka mitano. Nilikuwa naishi naye vizuri  kama mwanangu,”aliongeza Hadija.
Hassan Kihelelo, mmoja wa majirani wa mtuhumiwa alidai Musa alikuwa na mazoea ya kumfanyia visa mkewe na kudai mwaka jana alimpiga Yusta na kumchana mkono.
Alidai ulichanika  baada ya kupigwa na stuli lakini alinyanyua mkono huo  kuizuia isimuumize kichwani.
Wakati wa uhai wake, marehemu Yusta alikuwa mfanyakazi  wa kampuni ya mawasiliano ya umma ya Frontline Porter Novelli.

CHANZO: NIPASHE

BOFYA HAPA KUSOMA ZAIDI HABARI HII

CHANZO CHA VURUGU BUNGENI CHASEMEKANA NI HIKI HAPA

Maoni ya Kamati ya Bunge ya Katiba, Sheria na Utawala kuhusu Muswada wa Sheria ya Mabadiliko ya Katiba wa 2013 yanadaiwa kuwa yalibadilishwa dakika za mwisho na kwamba suala hilo ndicho kiini cha vurugu zilizotokea bungeni mjini Dodoma juzi.

Gazeti hili limefanikiwa kuona nakala inayodaiwa kuwa ni maoni ya awali ya kamati hiyo ambayo yalikuwa na mapendekezo yanayotaka kuwapo kwa marekebisho kadhaa kwenye muswada huo, tofauti na yale yaliyowasilishwa bungeni juzi na Mwenyekiti wa Kamati, Pindi Chana.

Jumatano na Alhamisi wiki hii kulikuwa na mvutano mkubwa bungeni kiasi cha wabunge wa upinzani kutoka vyama vitatu vya NCCR -Mageuzi, Chadema na CUF kuungana na kususia mjadala kuhusu muswada huo.

Imedokezwa kuwa mvutano mkali kuhusu muswada huo ulianza ndani ya kamati hiyo wakati wajumbe wake ambao ni wabunge wa CCM walipotumia wingi wao kubadili maoni ya awali na kuweka maoni mapya, hatua ambayo inadaiwa kuwa ilikuwa na msukumo wa Serikali nyuma yake.

Ndani ya Kamati ya Bunge ya Katiba, Sheria na Utawala, wabunge wa upinzani ambao kwa idadi yao ni wachache walishindwa kuzuia mabadiliko hayo ya “lala salama” yanayodaiwa kuwa yaliwekwa Septemba 2, mwaka huu, hivyo waliazimia kuhamasisha wabunge wote wa upinzani kupinga marekebisho hayo kutokana na sababu kuu mbili.

Sababu hizo ni kutofanyika kwa mikutano ya wazi kwa umma (public hearing) upande wa Zanzibar na hatua ya kuwapo kwa mapendekezo ya Rais kurundikiwa madaraka makubwa ya uteuzi wa wabunge kutoka asasi za kijamii watakaoingia katika Bunge la Katiba.

Habari zinasema wakati fulani Naibu Spika wa Bunge, Job Ndugai alitembelea kamati hiyo wakati ikiedelea na vikao vyake na kukuta mvutano mkali kuhusu suala la marekebisho ya sheria ya sheria hiyo na alishauri kwamba pale ambapo hawataweza kuelewana basi wasubiri uamuzi ndani ya Bunge.

Jana gazeti hili lilimtafuta Chana kupitia simu yake ya mkononi na baada ya kumweleza kuhusu madai hayo alisema: “Tafadhali sana kwa sasa niko kwenye kikao, kwanza simu yako nimeipokea kwa heshima tu, tutafutane wakati mwingine”.

Waziri wa Katiba na Sheria, Mathias Chikawe alikiri kwamba kulikuwa na mapendekezo ya kuongeza idadi ya wabunge na namna ya kuwapata, lakini Serikali iliyakataa katika hatua ya majadiliano kabla ya suala hilo kufikishwa bungeni.

Tofauti ya maoni

Nakala ya taarifa ya awali ilipendekezwa kuwa katika kuteua wajumbe 166 wa Bunge la Katiba, Rais azingatie kikamilifu mtiririko wa mapendekezo ya kila kundi lililoainishwa katika kifungu cha (1) (c).

“Na endapo Rais hatazingatia mapendekezo ya kundi mojawapo, Rais afanye mrejesho kwa taarifa kwa kundi husika juu ya sababu za kutozingatia mtiririko wa mapendekezo yaliyowasilishwa kwake,” inasema taarifa hiyo

Source; Mwananchi

BOFYA HAPA KUSOMA ZAIDI HABARI HII

NAIBU SPIKA MH JOB NGUGAI,MBOWE WASHUTUMIWA KUKIUKA SHERIA ZA BUNGE KISHA KUPELEKEA VURUGUGU BUNGENI

KITENDO cha Naibu Spika wa Bunge, Job Ndugai, kukataa kumpa nafasi Kiongozi wa Kambi ya Upinzani Bungeni, Freeman Mbowe na kuwaamuru askari kumtoa kwa nguvu, lakini pia kiongozi huyo kugoma kutii amri ya kiti, na hivyo kuzua vurugu bungeni kimeibua hisia na maoni tofauti kutoka kwa wachambuzi mbalimbali.


Baadhi ya wachambuzi wa sayansi ya kisiasa pamoja na wafuatiliaji wa mambo, wamezungumzia tukio hilo kuwa linajengwa na sura mbili ya ukaidi na udhaifu wa kiti cha Spika.

Ni kwa namna hiyo wamemtaja Ndugai moja kwa moja kuwa pengine anaponzwa na ujasiri alionao lakini pia kushindwa kwake kutumia busara wakati wa kufanya maamuzi ya kiti.

Wakati Ndugai akishutumiwa kwa namna hiyo, Kiongozi wa Kambi ya Upinzani Bungeni, Freeman Mbowe naye amenyooshewa kidole lakini kwa sura tofauti na ile ya Ndugai.

Hatua hiyo inakuja ikiwa ni siku chache, baada ya vurugu kubwa pengine kuliko zote zilizowahi kutokea bungeni, ambazo chanzo chake ni pale Mbowe aliposimama na Ndugai kushindwa kumpa nafasi ya kuzungumza alichotaka kusema badala yake akamuamuru kukaa chini kabla hajawaita askari kumtoa.

Ikiwa ni mwendelezo wa vurugu zilizowahi kutokea bungeni siku za nyuma, wachambuzi hao wameanza kupata shaka na hata kuanza kuhoji ni kwanini matatizo mengi yanapotokea bungeni chanzo chake huwa ni kiti ambacho wakati huo huwa kimekaliwa na Ndugai.

Wanaoliona hilo wanamzungumzia Ndugai kwamba huenda anaponzwa na ujasiri wake wa kiti kuliko kutumia busara.

Wanahoji alikoupata ujasiri Ndugai wakati ambapo Tanzania inafuata mfumo wa Kibunge wa Jumuiya ya Madola unaotoa fursa sawa kwa Kiongozi wa Kambi ya Upinzani na Waziri Mkuu.

Wakati haya yakitokea sasa, wachambuzi hao wameanza kuupima utendaji wa Ndugai kwa namna ya kuangalia idadi ya matukio ambayo yamekuwa yakivuruga mwenendo wa Bunge wakati yeye akiwa amekalia kiti.

Katika hilo, itakumbukwa kuwa Mbunge wa Ubungo, John Mnyika (Chadema), aliwahi kufukuzwa bungeni na Ndugai baada ya kutamka kuwa Rais Jakaya Kikwete ni dhaifu.

Mbali na hilo, Mei 30 mwaka huu, Ndugai alilazimika kuahirisha Bunge mara mbili na kusitisha hotuba ya Bajeti ya Wizara ya Mambo ya Nje na Ushirikiano wa Kimataifa baada ya wabunge wa CUF, kumchachamalia Mbunge wa Nyamagana, Ezekiah Wenje (Chadema), ambaye alisema msimamo wa kiliberali wanaoufuata CUF unashabikia ushoga na usagaji.

Ni kwa mwenendo huo wa utendaji wa Ndugai, Mwanasheria maarufu nchini, Majura Magafu, ameeleza kushangazwa na mwenendo wa Naibu Spika huyo huku akihoji kuwapo kwa mlolongo wa mizozo inayoibuka ndani ya Bunge wakati anapoongoza vikao.

“Huwa najiuliza maswali mengi, ni kwanini kila wakati Ndugai akiwa kwenye kiti kunatokea mzozo? Hapa ni dhahiri kuwa kuna udhaifu mkubwa na hata kwa kiti kizima cha spika, wameshindwa kuendesha Bunge na hata wabunge wenyewe hawajiheshimu,”alisema.

Alieleza kuwa siku zote hakuna aliye juu ya sheria, hivyo kitendo cha Mbowe kukaidi amri ya Naibu spika nayo ni kukiuka sheria.

“Wabunge watambue kuwa Bunge ni sehemu inayoheshimika na inastahili ipewe heshima. Pia watambue kuwa Bunge haliongozwi kama klabu ya pombe bali kuna kanuni na sheria.

“Mbunge na Spika wanapokiuka kanuni wanakuwa hawawatendei haki Watanzania na hawajatumwa bungeni kwenda kutukanana na kupigana bali kutatua matatizo ya wananchi,” alisema Magafu.

Kwa upande wake, Mwanasheria, Peter Kibatala, alisema Kiongozi wa Kambi ya Upinzani Bungeni, hadhi yake ni sawa na Waziri Mkuu, hivyo hata kama amekosea hatakiwi kuamriwa kama wabunge wengine, bali kiti cha spika kinatakiwa kitumie staha.

“Kuna namna ya ‘kum-handle’ Kiongozi wa Kambi ya Upinzani Bungeni tofauti na wabunge wengine. Ndugai alitakiwa kutumia busara ya kipekee si kama alivyofanya na ndiyo maana yakatokea yote yale,”alisema Kibatala.

Mwanasheria nguli nchini, Masumbuko Lamwai, alisema ni dhahiri kwamba Ndugai si kiongozi kwa kuwa kila fujo inapotokea bungeni yeye anakuwa kwenye kiti.

“Kiongozi wa Kambi ya Upinzani ni tofauti na wabunge wengine mfano angesimama Waziri Mkuu wangemwambia akae chini?,”alihoji Lamwai.

Alipoulizwa na gazeti hili endapo ni sahihi kwa kitendo cha Mbowe kukaidi amri ya Naibu Spika, alisema suala lililokuwa linazungumzwa lilikuwa kubwa hivyo alitakiwa kusikilizwa.

“Ndugai aachie ile nafasi haimfai na waliomchagua hawakuchagua kiongozi. Ile issue ilikuwa hot hivyo alitakiwa kutumia busara na uongozi wakati mwingine ni busara si sheria,”alisema Lamwai.

Mhadhiri wa Chuo Kikuu cha Dar es Salaam, Bashiru Ali, alisema kilichotokea bungeni ni kawaida na inaweza kutokea hata nje ya Bunge kwa kuwa watu hawataki kufikia muafaka wa namna ya kupata Katiba.

“Tunatakiwa tuangalie chanzo na si kilichotokea bungeni na tunaweza kushuhudia vurugu kama zile hata nje ya Bunge. Waliofanya vile ni wale wenye wasiwasi kuhusu mchakato wa Katiba kutokana na mwenendo wake,”alisema Bashiru Ali.

Naye Mwanasheria Mabere Marando alisema Kiongozi wa Kambi ya Upinzani anaposimama bungeni hata kama kuna mbunge anazungumza anatakiwa asikilizwe kama alivyo kwa Waziri Mkuu.

Source: Mtanzania.

BOFYA HAPA KUSOMA ZAIDI HABARI HII

MPANGO MKAKATI WA 'Big result now' WAZINDULIWA RASMI

Wadau wa maendeleo ya elimu nchini wakimsikiliza Waziri wa Elimu na Mafunzo ya Ufundi Stadi, Dk Shukuru Kawambwa alipokuwa akizindua mpango mkakati wa kuinua sekta ya elimu ujulikanao kama Matokeo Makubwa Sasa (BRN), Dar es Salaam 

Dar es Salaam. Wakati Serikali kupitia Wizara ya Elimu na Mafunzo ya Ufundi Stadi jana ikizindua Mpango wa Matokeo Makubwa Sasa (BRN) katika sekta ya elimu, wadau wa elimu na maofisa elimu wa mikoa wameutilia shaka utekelezaji wake kwa mwaka huu kwamba hautafikia kiwango kilichokusua.

Mpango huo uliozinduliwa jana, utekelezaji wake ulianza Aprili mwaka huu na moja ya utekelezaji wake ni kuhakikisha kuwa matokeo ya wanafunzi wanaotarajia kufanya mtihani wa darasa la saba wiki tatu zijazo, kidato cha nne miezi miwili ijayo yanakuwa mazuri, jambo ambalo limepingwa na wadau hao.

Mara baada ya Waziri wa Elimu na Mafunzo ya Ufundi, Dk Shukuru kuzindua mpango huo, Wakurugenzi wa taasisi mbalimbali za elimu za Serikali pamoja na maofisa elimu wa mikoa yote nchini walikula kiapo cha kuhakikisha kuwa wanasimamia mpango huo kikamilifu.

Wakati wakiapa, wengi walikuwa wakisema kuwa watajitahidi, kujituma ili kuhakikisha kuwa maendeleo ya haraka yanapatikana na kukwepa kutamka wazi kuwa mpango huo utafanikiwa, jambo ambalo liliwafanya mamia ya watu waliohudhuria uzinduzi huo kuwashangilia.

Wakizungumza na gazeti hili kwa nyakati tofauti walisema ni ndoto kwa wanafunzi kufanya vyema katika mitihani yao ya darasa la saba, kidato cha nne katika muda uliobaki.

Akizindua mpango, Dk Kawambwa alisema kuwa utekelezaji wake ulishaanza tangu mwezi Aprili na kwamba anatarajia matokeo ya haraka.

Mhadhiri wa Chuo Kikuu cha Dar es Salaam, Profesa Amandina Lihamba alisema Serikali imekuwa na mipango mingi mizuri mno, lakini tatizo liko kwenye utekelezaji. Naye Mwenyekiti wa Chama cha Wamiliki wa Shule Binafsi Tanzani (Tamongsco), Mak Mringo alisema kuwa kiapo walicholishwa wakurugenzi wa elimu katika uzinduzi huo hautekelezeki kwa kuwa mpango huo uko kinadharia zaidi.

Kuhusu motisha kwa walimu ambayo ni mkakati wa mpango huo, Mringo alisema kuwa Serikali inazo fedha za kumaliza madai ya walimu, ila hakuna mfumo mzuri wa kuhakiki madeni hayo.

Naye Ofisa Elimu wa Halmashauri ya Wilaya ya Morogoro vijiji, Donald Wilson alisema mkakati huo hautaleta matokeo mazuri kwa mwaka huu.

Naye Kada wa Chama cha Tanzania Labour (TLP), Mutamwega Mugaywa ambaye pia ni mdau wa elimu, japo aliusifu mpango huo alisema umechelewa.

Ofisa Elimu Mkoa wa Ruvuma, Mayasa Ali Hashim alisema kwa mwaka huu haitawezekana kwa mpango huo kutekelezeka kwa maelezo kuwa muda uliobaki kwa wanafunzi wa darasa la saba, kidato cha nne kufanya mitihani yao ya mwisho, ni mfupi.
                       Na Elias Msuya na Fidelis Butahe

BOFYA HAPA KUSOMA ZAIDI HABARI HII

HIVI NDIVYO ILIVYOKUWA WAKATI WA IBADA YA KUUAGA MWILI WA MAREHEMU ASKOFU MOSES KULOLA TEMEKE DAR ES SALAAM

MAZISHI ya Askofu Mkuu wa Kanisa la Evangelical Assemblies of God Tanzania, Dk. Moses Kulola yamezua mambo baada ya baadhi wachungaji wa makanisa mengine waliofika kuuaga mwili wake kufanya mambo yaliyotafsiriwa na baadhi ya waombolezaji kuwa ni kuoneshana jeuri ya fedha, Uwazi lilikuwepo.
 

Jeneza la mwili wa marehemu likiwa mbele ya waombolezaji.

Shughuli ya kuuaga mwili wa marehemu huyo aliyefariki dunia Agosti 29, 2013 ilifanyika Agosti 31, 2013 kwenye viwanja vya Kanisa la EAGT, Temeke, jijini Dar es Salaam ambapo pia watumishi hao wa Bwana wengi wao waliwasili na magari ya kifahari huku kila mmoja akionekana kumfunika mwenzake kwa uzuri wa magari hayo.

Mchungaji, Anthony Lusekelo akisaini kitabu cha maombolezo.

Ilikuwa wakati wachungaji na maaskofu wa makanisa mbalimbali nchini walipopewa nafasi ya kumzungumzia marehemu, wengine walitamka rambirambi zao papo hapo na ndipo jeuri ya fedha ilipoonekana.
Mchungaji wa Kanisa la Mikocheni Assemblies of God, Dar, Dk. Getrude Pangalile Rwakatare alitangaza rambirambi yake kwa kusema anatoa shilingi milioni moja.

Mama Getruda Lwakatare  akisaini kitabu cha maombolezo.

Mchungaji wa Kanisa la Ufufuo na Uzima la jijini Dar, Josephat Gwajima ‘alimpiga kumbo’ Mama Rwakatare  baada ya kushika kipaza sauti na kutamka bayana kwamba kutokana na kifo hicho, yeye ameamua kutoa shilingi milioni kumi (10,000,000/=) kama rambirambi kwa familia ya Askofu Kulola.
Gwajima akasindikiza na maneno kwamba, anahisi furaha ya aina yake kusikia kuwa asilimia kubwa ya watumishi wa Mungu nchini wamepita mikononi mwa Dk. Kulola, akawataka  viongozi wote wa dini kufuata  nyayo zake  kwa manufaa ya nchi.
Baada ya Gwajima kutangaza ‘mzigo mnene’ wa rambirambi,  alifuatia Mchungaji Anton Lusekelo ‘Mzee wa Upako’ ambaye kabla ya kutamka atatoa kiasi gani alisema Gwajima amekwenda mbele sana, amemuweza, lakini yeye atakwenda mbele zaidi yake.

Mchungaji Josephat Gwajima akitoa salamu za rambirambi.

Baadhi ya waombolezaji walianza kutoa maneno ya chini kwa chini ‘wakitabiri’ kuwa, Mzee wa Upako angefurukuta sana angetoa shilingi milioni kumi na moja, lakini hali haikuwa hivyo.
Msikie Mzee wa Upako: “Gwajima ameniweza kweli kwa kuwa yeye ametoa milioni kumi, sasa mimi natoa milioni kumi na tano (15,000,000/=).”
Baada ya watumishi hao kutangaza rambirambi hizo baadhi ya waombolezaji waliohudhuria ibada hiyo walianza kunong’ona wakisema kuwa wachungaji hao waliamua kushindana kwa kuoneshana nani zaidi kwani wengi walifika na magari ya bei mbaya na sasa wanatangaza ‘mzigo mrefu’ kwa ajili ya rambirambi.
Hata hivyo, ilidaiwa kuwa wachungaji na maaskofu wengine waliamua kufanya siri rambirambi zao kwa vile ndivyo walivyojisikia.

Askofu Mkuu wa Kanisa la Full Gospel & Bible Fellowship (FGBF), Zakaria Kakobe.

Watumishi ambao walipata nafasi ya kusema lakini hawakutangaza rambirambi zao hadharani ni pamoja na Askofu Mkuu wa Kanisa la Full Gospel & Bible Fellowship (FGBF), Zakaria Kakobe, Askofu Sylvester Gamanywa ambaye pia ni Rais wa Wapo Mission International, Askofu David Mwasota wa Kanisa la Naioth Gospel Assembly, Nabii wa Kanisa la Living Water ‘Makuti Kawe’, Onesmo Ndegi, Mchungaji Florian Katunzi wa Kanisa la EAGT City Center na wengine wengi.
Kwa upande wake, Askofu Kakobe aliwataka waumini wa Kanisa la EAGT kusimama imara ili kuweza kudumisha amani na mshikamano ndani ya kanisa hilo na taifa kwa jumla kama alivyokuwa mwasisi wao, marehemu Kulola.
“Kutangulia kwa kamanda wetu Kulola kusiwe mwisho wa ushirikiano kati yenu wenyewe kwa wenyewe na makanisa mengine bali muendelee kudumisha yale aliyoyaacha,” alisema Kakobe alipopewa nafasi ya kusema ni jinsi gani alivyomfahamu Kulola.

Maaskofu na wachungaji wakiupokea mwili wa marehemu.

Mama Rwakatare aliwashtua wengi pale alipoanika matatizo yake ya ndoa na aliyekuwa mumewe, marehemu Rwakatare.
Alisema wakati wa matatizo ya ndoa yake, Askofu Kulola alimuombea mara nyingi huku akimfundisha Neno la Mungu na kumwambia kuwa hanyanyaswi yeye bali ni Yesu Kristo.
“Baada ya kuniombea, Kulola alikuwa akiniandikia barua kila mwezi ya jinsi ya kumwomba Mungu mpaka matatizo ya ndoa yangu yalipokwisha na hadi leo hii ninaishi bila kuwa na hofu, pia nimekuwa mchungaji kwa sababu ya mafundisho ya Jemedari Kulola, kama si yeye nisingekuwa hapa nilipo,” alisema  kwa majonzi makubwa Mama Rwakatare ambaye kanisa lake ni maarufu kwa jina la Mlima wa Moto.
Mazishi ya marehemu Kulola yanatarajiwa kufanyika jijini Mwanza kesho Jumatano.   Mungu ailaze pema peponi roho ya marehemu. Amina.

Source;Global Publishers

BOFYA HAPA KUSOMA ZAIDI HABARI HII

MBEYA YAJIPANGA KUWEKA JIJI SAFI.ATAKAYETUPA TAKA FAINI TSH 50000 NA ATAKAYEFANIKISHA KUKAMATWA KWA MCHAFUZI ANAPEWA TSH 20000 PAPO HAPO

Mkuu wa Mkoa wa Mbeya Abbas Kandoro amelazimika kuingilia kati kunusuru hali ya uchafu iliyokithiri ndani ya jiji la Mbeya kwa kuwataka Viongozi kusimamia Sheria.

Kandoro amesema Jiji la Mbeya ndiyo taswira ya Mkoa mzima hivyo hali ya uchafu inapozidi inatoa picha ya Mkoa mzima ambao utaonekana kuwa na sifa ya uchafu.

Amesema Jiji la Mwanza linaloongoza kwa Usafi kila Mwaka lina watu na wananchi kama wanaoishi Mkoani Mbeya husasani katikati ya Jiji la Mbeya na kushangazwa na kitendo cha kutopenda hali ya usafi.

Kutokana na hali hiyo Kandoro ameagiza viongozi wa Serikali za Mitaa, Kata na Halmashauri ya Jiji kuhakikisha wanasimamia na kutekeleza sheria ya Usafi wa mazingira na matokeo yake yapatikane ndani ya mwezi mmoja.

Hivyo sheria ya Halmashauri ya Jiji la Mbeya inasema atakayebainika kutupa takataka sehemu isiyoruhusiwa atalipa faini ya Shilingi 50,000/= huku mtu yeyote atakayemkamata anayetupa taka na kumfikisha kunakotakiwa atalipwa 20,000 papo hapo.

 

Hayo yamebainishwa katika mkutano wa Wadau wa Usafi wa Mazingira ulioitishwa na Mkuu wa Mkoa wa Mbeya Abbas Kandoro uliofanyika katika ukumbi wa Mkapa Sokomatola Jijini Mbeya.

Kutokana na maagizo hayo baadhi ya wajumbe waliohudhuria mkutano huo wameunga mkono suala hilo na kwamba ajira zitaongezeka kwa vijana kuwawinda wanaochafua mazingira na kujiongezea kipato.

BOFYA HAPA KUSOMA ZAIDI HABARI HII

MAAJABU;JENEZA LA MTOTO MDOGO LAKUTWA NJE YA MGAHAWA HUKO MWANZA

Jeneza la mwili wa mtoto ambalo lilikutwa limetelekezwa mbele ya mlango wa mgahawa wa Ester. ---

JENEZA lenye mwili wa mtoto mchanga, limezua taharuki kwa wananchi na wakazi wa Mtaa wa Ihago, Kata ya Mahina, Wilaya ya Nyamagana jijini Mwanza.

Tukio hilo la kushangaza na la aina yake, lilitokea Agosti 29, mwaka huu, majira ya saa 12:00 asubuhi baada ya kugunduliwa na mfanyabiashara Ester Musa (28) likiwa limetelekezwa kwenye mlango wa mgahawa wake.

 Jeneza likiwa limefungwa tayari kwa kwenda kuzika mara ya pili. --

Jeneza hilo linaaminika kufukuliwa na watu wasiofahamika kwenye moja ya makaburi eneo la Mahina jijini hapa.

Akizungumza kuhusiana na tukio hilo, Ester anayemiliki na kuendesha mgahawa alisema, alifika katika eneo lake hilo la biashara, ghafla akapigwa na mshangao baada ya kuona jeneza likiwa mbele ya mlango wa mgahawa wake.

Umati wa watu uliofika kushuhudia tukio hilo.

“Nashindwa kujua nini maana ya tukio hili sababu hivi karibuni nilikuta barua imebandikwa ukutani ikinitaka nihame kutoka eneo hili, vinginevyo nitaona nitakachofanyiwa. Leo nimekuta jeneza mlangoni,” alisema Ester na kuongeza;

“Tukio hili nalihusisha na imani za kishirikina lakini kubwa linachangiwa na wivu wa kibiashara.Tangu lizaliwe sijawahi kuona jambo kama hili. Hapa sijawahi kugombana na mtu yeyote nashangaa kufanyiwa kitendo cha namna hii katika eneo la biashara yangu.”

Difenda ya polisi ikiondoka eneo la tukio na jeneza hilo kuelekea makaburini. --

Mwenyekiti wa mtaa huo, Anthony Deus alisema kitendo cha kufukua mwili wa marehemu tena mtoto mchanga, si cha kibinadamu na ni tukio la kusikitisha katika jamii, hivyo watakaobainika watachukuliwa hatua za kisheria.

Kaimu Kamanda wa Polisi, Mkoa wa Mwanza, ACP Christopher Fuime, alikiri kuwapo kwa tukio hilo na kusema hakuna mtu aliyekamatwa akihusishwa nalo.

 Mwili wa mtoto ukizikwa mara ya pili. -

“Tunaendelea na uchunguzi lakini hadi sasa hakuna aliyekamatwa akihusishwa na tukio hili la kusikitisha… wananchi wameuzika upya mwili wa mtoto huyo,” alisema

BOFYA HAPA KUSOMA ZAIDI HABARI HII

JINSI MWANAJESHI WA JWTZ ALIVYOUWAWA HUKO DRC CONGO

JESHI la Ulinzi la Wananchi wa Tanzania (JWTZ), limeleezea namna mwanajeshi wake, Meja Khatibu Shaaban Mshindo, alivyouawa baada ya kuangukiwa na bomu, wakati akiwa katika jukumu la ulinzi wa amani nchini Jamhuri ya Kidemokrasia ya Kongo (DRC).

 

Pamoja na hayo, Watanzania wametakiwa kuimarisha mshikamano na kuachana na makundi yenye nia ya kuleta mgawanyiko, hasa katika kipindi hiki kigumu ambacho Tanzania imepoteza askari wake waliopewa dhamana ya kitaifa ya ulinzi wa amani katika nchi zenye migogoro Afrika.

 

Akitoa salamu za rambirambi wakati askari huyo wa kikosi cha Mizinga namba 83 KJ kilichopo Kibaha akiagwa rasmi kijeshi Dar es Salaam jana, Mkuu wa Majeshi ya Ulinzi, Jenerali Davis Mwamnyange, alisema askari huyo pamoja na askari watano wa Tanzania, waliangukiwa na bomu hilo na kujeruhiwa vibaya.

 

“Waliangukiwa na bomu Agosti 28, mwaka huu huko Goma DRC eneo walilokuwa wakifanyia kazi… Meja Mshindo aliumia vibaya na kukutwa na mauti njiani akipelekwa hospitalini,” alisema Jenerali Mwamunyange.

 

Alisema katika tukio hilo, askari wengine watano wa Tanzania walijeruhiwa vibaya na wanaendelea vizuri na matibabu nchini humo na hali zao zinaendelea vizuri.

 

Akimzungumzia Meja Mshindo, Jenerali Mwamunyange alisema katika uhai wake alikuwa mchapakazi, muaminifu, hodari na mtiifu na kifo chake kimetokea wakati jeshi linamhitaji.

 

“Kifo chake kimeacha pengo ndani ya JWTZ na itachukua muda mrefu kuziba pengo hili.” Waziri wa Mambo ya Nje na Ushirikiano wa Kimataifa, Bernard Membe, alisema kifo cha askari huyo ni msiba wa kitaifa na kumtaja Meja Mshindo kuwa shujaa aliyekutwa na mauti wakati akitekeleza kazi aliyotumwa na nchi yake.

 

Alisema kifo hicho pamoja na vifo vya askari wengine saba wa JWTZ vilivyotokea Darfur mwaka huu, ni chachu kwa Tanzania kuendeleza jitihada za kusaidia nchi zenye migogoro na kuhamasisha amani Afrika.

 

“Serikali inapata matumaini namna Watanzania walivyosimama pamoja na kuunga mkono jeshi letu katika kipindi hiki kigumu. Ingekuwa nchi nyingine, haya yaliyotokea yangeleta mgawanyiko mkubwa miongoni mwa raia, lakini kwa hapa kwetu hali imekuwa tofauti,” alisema Membe.

 

Aliwataka wachache wenye mawazo ya kutumia matukio hayo kuwagawa Watanzania, waache mara moja nia yao hiyo, kwa kuwa moja ya kazi ambayo Tanzania inayo, ni pamoja na nia yake ya kuhamasisha na kutangaza amani Afrika na dunia kwa ujumla.

 

“Jamani wajibu wetu ni kuhakikisha haya maeneo yenye migogoro yanakuwa na amani, kule DRC hali ni mbaya, watu wanakufa kila kukicha na akinamama na watoto wanabakwa na kudhalilishwa, sasa sisi kama taifa ni vyema kujitokeza na kusaidia wenzetu,” alisisitiza.

 

Meja mshindo, alizikwa jana nyumbani kwao Fujoni Zanzibar na ameacha mke mmoja, Hawa Mnimbo na watoto watatu ambao ni Shaaban, Abuu na Samir Mshindo

BOFYA HAPA KUSOMA ZAIDI HABARI HII

SABABU YA MAPACHA KUUNGANA YAWEZA KUWA NI HII ISOME HAPA CHINI

Pili alijifungua mapacha hao saa 1:00 asubuhi ya Agosti 18, 2013, nyumbani kwake na baadaye kupelekwa kwenye Hospitali ya Mnazi Mmoja, Zanzibar baada ya watoto kuonekana si wa kawaida.

Kufuatia matukio kama hayo, Ijumaa Wikienda lilichimba kwa undani ili kubaini nini husababisha wanawake kubeba ujauzito wenye matokeo ya mapacha walioungana au mtoto mmoja kulemaa kiungo chochote cha mwili.
Mtaalam mmoja aliyesomea mambo ya afya ya uzazi ambaye aliomba hifadhi ya jina, ndiye aliyefunua siri hii nzito ambayo wanawake wengi nchini hawaijui isipokuwa kwa kusoma habari hii leo.
Mtaalam huyo alivitaja vidonge maarufu kwa matibabu ya tumbo la kuendesha viitwavyo Flagyl au Metronidazole kuwa ndivyo vinavyosababisha matatizo hayo.
Alisema vidonge hivyo ni hatari mno kwa afya ya mama mjamzito, hasa kwa mtoto aliye tumboni ambaye anatarajwa kukua na kutoka akiwa amekamilika.
“Wanawake wajawazito, hasa wakiwa wa miezi mitatu ya mwazo, hawatakiwi kabisa kutumia vidonge hivi aina ya Flagyl.
“Hivi vidonge ndivyo husababisha tatizo hili la watoto mapacha kuzaliwa wameungana, kitaalam tunaita Siamese Twins.
“Unajua kwa kawaida mimba huanza kuwa binadamu kamili miezi mitatu tu ya mwanzo, kitaalam tunaita First Trimester ambapo kila kitu kinachopaswa kuwa kiungo cha mwilini hufanyika.
“Baada ya hapo mpaka mwezi wa tisa ni kukua kwa viungo hivyo.
“Katika kipindi hiki cha miezi mitatu ya mwanzo kuelekea miezi mingine hadi tisa, mwanamke akitumia Flagyl kwa sababu viungo vinakuwa, ni rahisi kwa watoto kuungana au kuzaliwa wakiwa na ulemavu wowote,” alisema mtaalam huyo.
Mtaalam huyo alisema vidonge hivyo ambavyo hupatikana kirahisi kwenye maduka ya madawa (famasi) hutumiwa zaidi kwa matatizo ya tumbo, hasa la kuendesha.
“Kwa nchi za wenzetu (zilizoendelea), ili mtu auziwe vidonge ambavyo vinaweza kuleta madhara lazima awe na karatasi ya maelekezo ya matumizi kutoka kwa daktari.
“Hakuna daktari wa kweli hata mmoja atakayekubali kumpa Flagyl mwanamke mjamzito, kwa sababu anajua madhara yake,” alisema.
Kuhusu Pili Hija, mapacha wake walifanyiwa upasuaji Agosti 29, 2013 katika Hospitali ya Taifa Muhimbili Kitengo cha Tiba ya Mifupa (Moi) chini ya daktari wa upasuaji wa watoto, Dk. Zaituni Bokhary.
Mtoto aliyebaki ni yule aliyezaliwa akiwa na kichwa, ilibidi kumuondoa asiye na kichwa kwa sababu asingeweza kuwa binadamu kamili.
Dokta Bokhary alisema hii ni mara ya kwanza kwa jambo hilo kutokea katika miaka ya hivi karibuni. Mara ya mwisho lilitokea mwaka 1984.

BOFYA HAPA KUSOMA ZAIDI HABARI HII